As sete e media preséntase na Facultade de Filosofía, en Mazarelos, o libro Historia da Filosofía para a selectividade , un manual do que é autor Benito Arbaizar Gil, profesor de Filosofía no instituto Eusebio da Guarda da Coruña e na UNED.

-¿É un temario só para a proba de selectividade?

-O ano pasado aplicouse un novo deseño da proba de
Filosofía, e os libros de texto non poden recoller as modificacións, así
que me vin na obriga de artellar materiais de apoio para axudarlles aos
alumnos. O libro é froito dos axustes que fixen da materia de segundo
de bacharelato aos cambios específicos da proba en Galicia.

-E decidiu publicalos.

-Iso veu despois de comprobar o desconcerto entre
os compañeiros, que expresaban a mesma preocupación por preguntas para
as que non tiñan resposta. E porque a desorientación dos alumnos diante
dunha proba moi estruturada era grande.

-¿A Filosofía non mantén un temario reducido para a selectividade?

-A historia da Filosofía ten dous mil anos, é
imposible de abarcar, polo que sempre se acurtou. Os cambios na
selectividade están moi ben, pero non estabamos adaptados.

-¿Traballan para preparar a proba, non para o coñecemento, non si?

-Non é fácil solucionar iso. En segundo de
bacharelato non traballas como noutros cursos, porque a realidade da
proba imponse, e non podes frustrar o proxecto de futuro dos rapaces.